FC Kosova Gjenevë fiton Kupën e Diasporës në një finale emocionuese ndaj FC Kosova Düsseldorf
Një ndeshje e madhe futbolli, plot emocione dhe rivalitet vëllazëror, u zhvillua mes dy ekipeve me të njëjtin emër, por me rrënjë të përbashkëta shqiptare — FC Kosova Düsseldorf dhe FC Kosova Gjenevë, të cilat u përballën për Kupën e Diasporës, një trofe me peshë të veçantë për komunitetin shqiptar jashtë vendit.
Finalja, e organizuar nga Federata e Futbollit Shqiptar në Gjermani (FFSHGJ) dhe Unioni i Klubeve Shqiptare të Futbollit në Zvicër (UKSHFZ), nën ombrellën e FFK-së dhe me mbështetjen e MPJD-së, u zhvillua në Gjermani, ku nikoqir ishte FC Kosova Düsseldorf.
Skuadra vendase kaloi në epërsi në minutën e 17-të pas një aksioni të bukur kombinativ. Megjithatë, FC Kosova Gjenevë reagoi fuqishëm në pjesën e dytë, duke përmbysur rezultatin me dy gola dhe duke triumfuar me shifrat 1 : 2. Pavarësisht se humbi një penallti gjatë lojës, ekipi nga Zvicra tregoi karakter dhe vendosmëri, duke u shpallur fitues i Kupës së Diasporës.
Pas përfundimit të ndeshjes, Kryetari i Federatës së Futbollit të Kosovës, z. Agim Ademi, i dorëzoi trofeun kapitenit të FC Kosova Gjenevë. Po ashtu, u ndanë mirënjohje për klubet dhe organizatorët nga përfaqësuesit e federatave, z. Enver Muzliukaj (FFSHGJ) dhe z. Feti Demoli (UKSHFZ).
Ndeshja u filmua nga TV SYRI në Zvicër dhe pritet të transmetohet së shpejti, bashkë me intervistat e organizatorëve, drejtuesve të klubeve dhe lojtarëve.
Në një atmosferë miqësie dhe respekti, FC Kosova Gjenevë dhe drejtuesit e Unionit u mirëpritën ngrohtësisht në Düsseldorf nga nikoqiri FC Kosova dhe Federata Shqiptare e Futbollit në Gjermani, të cilët organizuan darkën dhe akomodimin për të gjithë pjesëmarrësit.
Të dyja skuadrat kanë ardhur në këtë finale si kampione në vendet përkatëse — FC Kosova Düsseldorf si fituese e Kupës së Klubeve Shqiptare në Gjermani dhe FC Kosova Gjenevë si fituese e Kupës në Zvicër.
Në fund, kjo ndeshje nuk ishte thjesht një përballje sportive, por një manifestim i shpirtit të diasporës shqiptare, që bashkon zemra e pasione përmes futbollit, nën një emër të përbashkët: Kosova.
